ప్లేస్ : ఉమేష్ నగర్ లో రద్దీ గా ఉన్న ఒక వైన్స్
సమయం : ప్లేస్ నువ్వు చెప్పినాసరే...నన్ను చెప్పమన్న సరే...టైం నువ్వు చెప్పినా సరే ..నన్ను చెప్పమన్నా సరే...అంటూ కొందరు తొడలు కొడుతున్నారు... సో ప్లేస్ నేను చెప్పాను కాబట్టి టైం వాళ్ళ ఊహకే వదిలేస్తున్నాను...
చమురయ్య ముచ్చటగా మూడో క్వార్టర్ మూత తీస్తున్నప్పుడు
అయ్యా బాగున్నావే ....అంటూ ఒక వాయిస్
చమురయ్య : నేనైతే బాగున్నా గని నీకైతే మందు పొయ్య ....ఎందుకంటే నాకే సరిపోదు.
అపరిచిత వ్యక్తి : నాకు మందేం అవసరం లేదు గని నీ గురించే అచ్చిన...
చమురయ్య : నా గురించా...ఎవరు బిడ్డా నువ్ ....
అపరిచిత వ్యక్తి: నేను నీకు పుట్టని కొడుకుని నాన్న ....
చమురయ్య : నేను పెద్ద కొడుకిన్నా...చిన్న కొడుకిన్నాగని గీ పుట్టని కొడుకుని ఇనలే...
అపరిచిత వ్యక్తి: నిజం నాన్న .. కావాలంటే నువ్ తాగే మందు మీదొట్టు నాన్న ...
చమురయ్య : మొగోడు మందు మీదొట్టేసి చెప్తండంటే నిజమే బిడ్డ...నువ్ నా కొడుకువే.. నువ్ అచ్చినవ్ కదా ఇప్పుడు ...ఇప్పుడు వాని సంగతి చెప్తా ...
పుట్టని కొడుకు : ఎవని సంగతి ....
చమురయ్య : గదే బిడ్డ నీ రెండో బావ సంగతి .... వాణ్ని ఇయ్యాళ మలేషియా ల మచ్చల పిల్లిని కొట్టినట్టు... దుబాయ్ ల దున్నపోతును కొట్టినట్టు కొట్టాలి బిడ్డ ....వాని గూబ పగల గొట్టుడే .....కాదు కాదు నీ చేత పగలగొట్టిచ్చుడే...
పుట్టని కొడుకు : అంటే అమ్మను ముందుకు తోసి ఎనకాల నిల్చున్నట్టు ....ఇప్పుడు నన్ను ముందు పెట్టి నువ్ ఎనక నిల్చుంటావా ....మోడీకి భయపడి సోనియా గాంధీ ఎనకాల దాక్కున్న రాహుల్ గాంధీ లెక్క కనపడ్తన్నవ్ నాన్న నాకు ..
చమురయ్య : అదంత కాదు బిడ్డ ...అక్కడ వాడెక్కువ చేస్తండు....వాంది పలిగి పోవాలియాల..
పుట్టని కొడుకు : సరే పోదాం గని ముందుగాల నాకు కొన్ని డౌట్స్ ఉన్నాయి గవి క్లారిఫై చేయి..
చమురయ్య : హా ..చెప్పు బిడ్డ చేత్తా..
పుట్టని కొడుకు : గది గాదె నాన్న మన బావలు....సారి సారి నా బావలు ఎసొంటోళ్లే ....
చమురయ్య :బావలా ...బిడ్డ సరే నేను చెప్తా గని నేను ఒక్కొక్కరి గురించి చెప్పేటప్పుడు ఒక్కో పాటేస్కో ...పెద్దొని గురించి చెప్పేటపుడేమో అతడు సినిమా ల "అదరక బదులే చెప్పేటి తెగువకి తోడితడే " టైటిల్ సాంగ్ అన్న మాట ఆదేసుకో...ఇగ చిన్నోని గురించి చెప్పేటప్పుడేమో గబ్బర్ సింగ్ ల "దేఖో దేఖో గబ్బర్ సింగ్ " అదేసుకో ...ఎందుకంటే ఆయనే అసలే పవన్ కళ్యాణ్ ఫ్యాన్ ...
పుట్టని కొడుకు : అవసరమా నాన్న ఇదంతా ....
చమురయ్య : నువ్వేం బాధ పడకు బిడ్డ ...ముందు ఎత్తుడు ....తర్వాత పడేసుడు మనకు అలవాటే .. ఇగ చెప్తాన్న ఇనుకో ...పెద్దోడు మన "పే"నోడే...పేరు రబీ ....మనిషి బంగారం
పుట్టని కొడుకు : "రబీ" నా .. ఇదేదో సీజన్ పేరు లా ఉందే ...
చమురయ్య :వాళ్ళ నాన్నకు దొంగరేణి పని రాకముందు ఆయనే ఒక రైతు ....అయినేకు రబీ సీజన్ అంటే బొచ్చెడు ఇష్టం అందుకనే ...కొడుకు పుట్టుడు తోనే గా పేరు పెట్టిండు
పుట్టని కొడుకు : నాన్న నేను ఎంత గట్టిగ అతడు టైటిల్ సాంగ్ వేసుకున్నా అదివేరే అస్తంది నాన్న ...లక్ష్మీస్ ఎన్టీఆర్ సినిమాల "నేను జీవితం లో చేసిన ఒకే ఒక పొరబాటు ....వీణ్ణి నమ్మడం...దగా ....దగా " అని వస్తుంది నాన్న ....
చమురయ్య :అవునా బిడ్డ.... అయితే నిజాలే అస్తన్నయ్ అన్న మాట .....మల్ల చిన్నోనికి ఏత్తె ఏమస్తదో .....వద్దులే బిడ్డ ....టైటిల్ సాంగ్ కాన్సిల్... ఇగ చిన్నోని ..పేరు మాగర్.......మనిషి పవన్ కళ్యాణ్ ఫ్యాన్...అంటే చెప్పనే అక్కర్లే ...
పుట్టని కొడుకు : మాగర్....ఇది ఇంకా వెరైటీ ఉంది దీనికేంటి నాన్న ఫ్లాష్ బ్యాక్ ...
చమురయ్య :వాళ్ళ నాన్నకో తల్లుండేది ...ఆమెకో ఇల్లుండేది ...ఆ రెండు వాళ్ళ నాన్నకిష్టమే ...అందుకే రెండు కలిసేలా మాగర్ అని పెట్టాడు ...మా అంటే అమ్మ ....గర్ అంటే ఇల్లు ....
పుట్టని కొడుకు : బతికించావ్... నాన్నోయ్ ....
చమురయ్య :ఎందుకు బిడ్డ అట్ల అంటన్నవ్...
పుట్టని కొడుకు : వాళ్ళ నాన్నకో కుక్కుండేది....దాని పేరు టైగర్ ...అదంటే వాళ్ళ నాన్నకు చాలా ఇష్టం...అందుకే ఆ పేరు పెట్టారు ....అంటావనుకున్నా...
చమురయ్య : ఛీ మనకు కామెడీ కావాలి కానీ కాంట్రవర్సీ ఎందుకు బిడ్డ ..అందుకే అట్ల చెప్పలె...ఇగ రెండోవోని పేరు అన్నం బాబు ....వాడికా పేరు ఎట్లోచిందంటే ...
పుట్టని కొడుకు : ఆగు ఇక్కడి నుంచి నేను చెప్తా ....వాళ్ళ నాన్నకి అన్నం అంటే చాలా ఇష్టం ..అందుకే ఆ బావకి అన్నం బాబు అని పేరు పెట్టారు ...ఇదే గదా నువ్ చెప్పేది ...
చమురయ్య :అబ్బ ....ఏం చెప్పినవ్ కొడుకా ....నువ్ మన ఆతుగంటి వంశం ల పుట్టకున్నా సరే మనోనివే అనిపించినవ్ .....కానీ వీనికి ఇంకో పేరున్నది బిడ్డ ...పేరు కిషోర్ .... వీడు ఎంత గలీజ్ గాడంటే వాడు మాట్లాడితే పుకారు ....వాడు తాగితే బెంజ్ కారు ...వాడు తినే పండు ఆల్ బుకార్...మొత్తానికి వాడో బేకార్ ...వాడు నిజాలు చేప్తే అయితది మన జీవితం తారుమారు....వాడికి నచ్చిందే చేత్తడు...అందుకే అర్జెంటు గా నువ్విప్పుడు వాణ్ని కొట్టాలే ....
పుట్టని కొడుకు : వాడు ఫుల్లు తాగుతాడు అన్నవ్ ....ఏంటీ ..నీ కన్నా ఎక్కువనా ....
చమురయ్య : నేనెంత బిడ్డ డైలీ పొద్దునో క్వార్టర్ సాయంత్రమో క్వార్టర్ ....అప్పుడప్పుడు బోనస్ కింద ఇంకో క్వార్టర్ అంతే ...కానీ వాడు సంవత్సరానికి పది సార్లే తాగుతాడు గని ఫుల్లు తాగుతాడు బిడ్డ...
పుట్టని కొడుకు: అది అందరు జెత్తరు గని వేరే మాటర్ ఉంటె చెప్పు ....
చమురయ్య :పెళ్ళాం మొగుళ్ళు ఎదో చిన్న గొడవ పెట్టుకొని మీ అక్క ఇక్కడనే ఉంటంది. ఇంటికొచ్చింది మొదలు రా...రెండు రోజులకోసారి ఫోన్ చేసి నా భార్యను నా దగ్గరికి పంపియ్ అని అడుగుతడు ...మేము పంపియ్యం అంటే ఇనడు...అరే మన చరిత్రలనే గొడవ పెట్టుకొని ఇంటికచ్చిన ఆడపిల్లను ఆరు నెలలు దాటనిది అత్త గారింటికి పంపించిందే లేదు ..
పుట్టని కొడుకు: ఇంతకీ గొడవ ఎందుకైంది నాన్న
చమురయ్య : కొత్త అల్లుడి ముందు అంతకు ముందు ఉన్న అల్లుణ్ణి అవమానించుడు మన ఆచారం బిడ్డ ...వీడు కొత్తగా ఒచ్చినప్పుడు పెద్దల్లుణ్ణి అవమానించినం ....మూడోడు వచ్చిన తర్వాత వీణ్ణి అవమానించినం.దానికే హర్ట్ ఐతరా ...నన్నైతే పెళ్ళాం, కూతుర్లు , అల్లుళ్ళు, సడ్డకులు అందరు తిడుతరు.. నేనేమన్నా హర్ట్ ఐతనా ....పోతా మందేసి లుంగీ ఎట్లున్నదో కూడా చూసుకోకుండా పంట ....మళ్ల మన ఇంకో కుటుంబ సంప్రదాయం ఏందంటే ఒక బిడ్డ పెళ్ళయిందంటే అంతకు ముందున్న బిడ్డ మొగుడితోని గొడవ పెట్టుకోనచ్చి మినిమిమ్ ఆరు నెలలు ఇట్లుండాలె ...రెండో దాని పెళ్లయినప్పుడు పెద్దది అచ్చి ఉన్నది ....మూడో దాని పెళ్లయినప్పుడు రెండోది అచ్చి ఉంటంది ....అరే ..మన ఆచార సంప్రదాయాలను తప్పంటుండు బిడ్డ ..అందుకనే నువ్ వాణ్ని కొట్టాలే ...
పుట్టని కొడుకు: నేనెట్ల కనబడుతున్న నాన్న నీకు ....అట్టర్ ఫ్లాప్ బాలయ్య బాబు సినిమాకు బ్లాక్ ల టిక్కెట్లు కొనే లెక్క కనబడుతున్నానా ...ఆచార సంప్రదాయాలు.. తొక్క ...తోట కూర పక్కకు పెట్టి అసలు నిజం చెప్పు ....
చమురయ్య : మళ్ల ఎనిమిది సంవత్సరాల నుండి మనమే పోషిస్తన్నం బిడ్డ... ఒక్క రోజు కూడా పనికి పోడు, నాలుగు లక్షల అప్పున్నది బిడ్డ ...
పుట్టని కొడుకు :నాకెక్కడో సింక్ కావట్లే నానా...పని చెయ్యడంటన్నావ్...మల్ల అంత అప్పున్నదంటన్నావ్ ...పని చేయనోనికి అన్ని లక్షలెవడిత్తడే.. నువ్వేదో దాస్తాన్నవ్ నాన్న ..
చమురయ్య : అరే నమ్మవా ....మన ఆతుగంటి వంశమోళ్ళు ఎప్పుడన్నా అబద్దాలాడుతర ...
పుట్టని కొడుకు : పిల్లి గుడ్డిదైతే ఎలుకచ్చి ఏదో చూపించిందంట...నిజం చెప్పు అంటన్నా ...
చమురయ్య : ఇగ నువ్ చెప్పకపోతే విడిచేటట్టు లేవుగాని ...ఒక్క మాటల చెప్తా ...వానికి మన ఫ్యామిలి ముచ్చట్లన్నీ తెలుసు... ముచ్చట్లు అంటే సీక్రెట్స్ అన్న మాట .....వాని భార్యను పంపకపోతే గవీటిని బయట పెడతా అంటుండు ...వీళ్ళందరూ మంచిగున్నపుడు ఏదో ప్రేమ కథా చిత్రం నడిపించారంటా ....ఇప్పుడు వాడు దాన్ని నాకు హార్రర్ కథా చిత్రం లెక్క చూపెడుతండు...
పుట్టని కొడుకు : అంటే మన ఫ్యామిలీ కూడా కూడా ట్రెండ్ ఫాలో అయిందన్న మాట ...
చమురయ్య : వీళ్లు ట్రెండ్ ఫాలో అవుడు ఏందోగని వాడు నా బెండు తీస్తండు...ఇప్పటికే ఇద్దరు కూతుర్లు, వాళ్ళ మొగుళ్ళ దగ్గరికి, దొంగరేణి జాబున్నోడు కందకర్రి నుంచి బీదావరిఖని కి డైలీ అప్ అండ్ డౌన్ చేసినట్టు చెస్తాండ్రు....ఇక అవ్వి బయటికేస్తే మూడోది కూడా అప్ అండ్ డౌన్ చేస్తది....
పుట్టని కొడుకు : అదీ ముచ్చట ..బ్లాక్ మెయిలింగ్ అన్న మాట ...
చమురయ్య : బ్లాక్ మెయిలింగో .....ఈ-మెయిలింగో ...వాడు నన్ను సంపుతండు బిడ్డ... నాకు నువ్వే దిక్కు బిడ్డ ...
పుట్టని కొడుకు : నాన్న.... నువ్ చెప్పినయ్ అన్ని విన్న తర్వాత నా రక్తం మరుగుతంది ....నా బొక్కలు ఉడుకుతన్నయి ....నా మాంసం మాడుతంది ....
చమురయ్య :కోపం ల రక్తం మరుగుడు ఇన్నగాని బొక్కలు ఉడుకుడు .... మాంసం మాడుడు ఏందీ బిడ్డ ..
పుట్టని కొడుకు : అంటే చెత్త గా ఉన్నా సరే కొత్తగా ఉందని ట్రై చేశా ....సరే అది పక్కకి పెడితే వరల్డ్ లనే నెంబర్ 2 వేస్ట్ గాడు బావ అని నేను ఒప్పుకుంటన్న ....
చమురయ్య : నెంబర్ 2 నా ???మరి నెంబర్ 1 ఎవరు బిడ్డ ???
పుట్టని కొడుకు : ఏందీ నాన్న తెల్వనట్టు గట్ల మాట్లాడుతున్నవ్ .. ప్రపంచం ల ప్రతీ కొడుక్కి కూడా తన నాన్నే నెంబర్ 1 అన్ని విషయాలల్ల ....నాక్కూడా నువ్వే నెంబర్ 1..నేను నీకు పుట్టనంత మాత్రాన నిన్ను నెంబర్ 1 గా మర్చిపోతా అనుకున్నావా నాన్న ...నిన్ను వేరే స్థానం ల ఊహించుకోలేను నాన్న .....నేను
చమురయ్య : నువ్ వాణ్ని కొడుతావో లేదో గాని నన్నైతే మాటల్తోని ఇయ్యర మయ్యర సంపుతన్నవ్ రా ....పా... ముందైతే వాణ్ని కొడుదువు ....
పుట్టని కొడుకు : ఒక డౌట్ నాన్న. ఆ బావ గాడు ఈ ఎనిమిది సంవత్సరాలల్ల ఎన్నిసార్ల అక్కను తన్ని తగలేసిండే నీ ఇంటికి ...
చమురయ్య : నా బిడ్డని గొట్టేంత ఉన్నదారా వానికి ....షంషేర్..మన మీద చెయ్యి పడది..
పుట్టని కొడుకు : అయితే ఈ ఒక్కసారే అన్నమాట గొడవ ..సరే గా సంగతి పక్కన బెట్టు ...సరే గీ బావంటే బేకార్ గాడు గలీజ్ గాడు కాబట్టి ఈ అక్కచ్చి ఇక్కడున్నది ..మరి పెద్ద బావ బీరు నోట్ల పెడితే తాగాల్న ....సప్పరియాల్నా అంటడు కదా .... మరి ఆ అక్కేందుకే సంవత్సరం ల ఆరు నెలలు అక్కడ, ఆరు నెలలు ఇక్కడ ఉంటది ...
చమురయ్య: మన ఆచార సంప్రదాయాల గురించి చెప్పిన కదా బిడ్డ .....
పుట్టని కొడుకు : గవన్ని ఉత్త ముచ్చట్లని నాకు తెలుసు గాని ....నిజం చెప్పు ... చెప్పలేదనుకో ...బావను మలేషియా ల మచ్చల పిల్లిని కొట్టినట్టు... దుబాయ్ ల దున్నపోతును కొట్టినట్టు కాదు నిన్నైతే.... అమెరికా ల అడ్డ గాడిదను కొట్టినట్టు ....కువైట్ ల కుక్కను కొట్టినట్టు కొడతా ....
చమురయ్య: హే ...నువ్వంత రివర్స్ మాట్లాడుతన్నావ్ గదంతా కాదు అచ్చి నీ బావను కొడుతావా లేదా..
పుట్టని కొడుకు : నువ్ అయితే ఆన్సర్ చెప్పు వాణ్ణి తన్నక పోతే నన్నడుగు..
చమురయ్య: తంతావ్ కదా ..... మాట మీదుండాలే మళ్ల ....
పుట్టని కొడుకు : హా తంతా ..
చమురయ్య : గిప్పుడైతే నీ పెద్ద బావ మంచోడు గని అంతకు ముందు "బీరు నోట్ల పెడితే తాగాల్న ....సప్పరియాల్నా" టైపు కాదు బిడ్డ.. ఒక్క బీరు నోట్ల పెడితే ....నా కాటన్ బీర్లు ఎక్కడ ??అని అడిగే టైపు .... ఆయనే కూడా మంచోడు కాదు బిడ్డా ....
పుట్టని కొడుకు : అదేందే రెండో బావంటే తాగుబోతు...పని చెయ్యడు ...కానీ పెద్ద బావ గురించి నాకు తెలుసు గట్టిగా రెండో బీర్ తాగితే అవుట్ ఐతడు, మూడో బీర్ కి మూడు పూటలు తిన్నదంతా కక్కుతాడు. అయిన జాబ్ కూడా చేస్తడు కదనే ...
చమురయ్య : గట్ల కాదు బిడ్డ చెడ్డోడంటే...అమ్మ అయ్యాను దేవుళ్ళ లెక్క చూసుకుంటడు.వాళ్ళని ఇడిచి పెట్టి వేరే కాపురం పెట్టనంటడు. నాకేమో వేరు కాపురం పెట్టాలంటది మీ అక్క..ఐనేమో సొంతిల్లు ఇడిచి పెట్టి అద్దింట్ల బతుకు రా మగడ అంటే ఇనడు. అందుకనే ఆ అక్క గొడవ పెట్టుకొనఛ్చి మనింట్లనే ఉంటది ...మల్ల బిడ్డ చెప్పుడు మరిచిన ...మతం మారుమంటడు బిడ్డ..
చమురయ్య : అదేంటి నానా ...నీకో న్యాయం ..నీ అల్లుడికో న్యాయమా ..భర్త ఏ మతం ల ఉంటె భార్య ఆ మతం లనే ఉండాలే కదా నానా.. నువ్వు హిందూ కాబట్టి అమ్మ హిందువు ల్లోకి వచ్చింది..బావ క్రిస్టియన్ అయితే ఆ మతం కె పోవాలే కదా నానా...
చమురయ్య : ఇగో నీకో సీక్రెట్ చెప్తన్న..మల్ల ఎవరితోనో చెప్పకు ...అయినే కూడా పని చెయ్యకపోతే గా జాబ్ కూడా మనం పెట్టించిందే బిడ్డా ...దానికి ఐదు వేలు నేనే గట్టిన
పుట్టని కొడుకు: ఊకో నానా నువ్వు.. నీ అబద్దాలు ..పాపం ఆ బావే డబ్బులు ఆరెంజ్ చేసుకున్నాడు ...ఎందుకట్లా అబద్దాలాడి ఇజ్జత్ దీత్తవ్ బావది... ఎవ్వరికి చెప్పద్దు అనుకుంట ఈ విషయాన్ని బీదావరిఖనిలా సగం మందికి చెప్పినవ్ ..నేనే ఇన్నా ...
పుట్టని కొడుకు రివర్స్ మాట్లాడ్డం తో చమురయ్య కి కోపం వచ్చింది...
చమురయ్య : అయినా నువ్వు పుట్టకున్నా ఐణేకు బామ్మర్దీవే రా.. అంతే లే బావ బామ్మర్థులొకటి ..
పుట్టని కొడుకు: అదేంది నాన్న అట్లాంటావ్ ...నాకు అయ్యా కంటే బావ ఎక్కువైతడా ...కాకపోతే ఎవరిదీ రైట్ అయితే వాళ్ళది రైట్ అంట ...
చమురయ్య (మనసులో) : వీడు మంచిగుంటే నిజాలు అన్ని బయట పెడుతండు ....కొంచంమందెయిస్తే మన దిక్కు మాట్లాడుతడు...మనం పంచాయితీలల్ల చేసేదిదే కదా...
చమురయ్య : బిడ్డా మందేత్తవా...కొంచం ఏయ్ బిడ్డ ..నేను చెప్తాన్న ఏయ్ బిడ్డ ...గొడవకు పోయేటప్పుడు ధైర్యం ఉండాలంటే కొంచం మందెయ్ ...
పుట్టని కొడుకు: అంతేనానే...
చమురయ్య : ఈ క్వార్టర్ తాగు
పుట్టని కొడుకు: గిట్లనే తాగాల్ననే...డైరెక్ట్ గా ..హే బేరర్ స్టఫ్ పల్లీలన్న అటుకులన్న తీస్కరా ....
చమురయ్య : చీప్ గ పల్లీలెంది బిడ్డ ...మన ఆతుగంటి వంశం ల ఆస్తులమ్ముకొని ఐన మటన్లు...చికెన్లే తినాలే .... బేరర్ చాపన్న చికెనన్న పట్టుకరా ...
బేరర్ : అన్న... డబ్బులు
చమురయ్య :హే ..పొ..వ్యా నువ్ ముందు పోయి మీ సేటుకి రెగ్యులర్ కస్టమర్ అతుగంటి చమురయ్య అని చెప్పు
బేరర్ : క్వార్టర్ నిలబడి కచ్చా కొట్టే రకం వీడు ..వీనికి చాపలు చికెన్ అంట ...
పుట్టని కొడుకు: నాన్న వాడేదో తిడుతండు నానా ..
చమురయ్య: అంటే నేను ఇనలేదనుకున్నవా....ఇన్నా సప్పుడేక ఉండాలే..ఏ షాపుకన్నా ఒకడే కస్టమర్ 35 సంవత్సరాలు కంటిన్యూ గ పోతే వానికి మంచి వేల్యూ ఇస్తరు... అదేందో తాగుబోతుల దరిద్రం ...వాడికి డైలీ మనతోనే పైసల్ అస్తయ్ కానీ వాడే మనల్ని చీప్ గ చూస్తాడు. అయినా నేను వాణ్ని ఇడిసి పెడుతా అనుకున్నావా ....వాని సంగతి చూస్తా....దెబ్బకు వాడు ఇంకోసారి మన జోలికి రాడు ....
పుట్టని కొడుకు:అంతఘనం ఏం చేస్తావ్ నాన్న ....
చమురయ్య: ఏమున్నది సీరియస్ గ వాణ్ని సైడ్ కి పిలిచి సింపుల్ గా వాని కాళ్ళ మీద పడుత....
పుట్టని కొడుకు: అప్పుడు "అరె.......హో......."అనే జబర్దస్త్ మ్యూజిక్ అస్తది కదా నాన్న ...
చమురయ్య: అవును బిడ్డ నీకెట్లా తెలుసు....
పుట్టని కొడుకు:అది జబర్దస్త్ చూసేటోళ్లకు అందరికి తెలుసు గాని ఏదన్న స్టఫ్ చెప్పు నాన్న ..
చమురయ్య: బేరర్ ఇగ కొడుకు ముందు ఇజ్జత్ తియ్యకు గని ఈ 20రూపాలు తీస్కపొయి నీ ఇష్టం అచ్చింది తీస్కర ..
బేరర్ : ఇప్పటి దాకా ఈ 20 రూపాయలతోనా చికెన్లు, మటన్లు అన్నది ......
చమురయ్య: హే పో ఇగ ఇజ్జత్ దీయకు అని చెప్పిన కదా ....
చమురయ్య (పుట్టని కొడుకు తో) : ఇగ బిడ్డ...ఇక్కడ చికెన్ చాపలు అంత మంచిగుండై నీట్ గ కడగరు ...మనం బాయిల్డ్ పల్లీనే తెచ్చుకుందాం ఉడక బెడితే క్రిములున్నా సచ్చి పోతయ్. సరేనా
పుట్టని కొడుకు: సరే నానా ఎదో ఒకటి గాని .....నానోయ్ నాకు తాగితే జ్ఞానం అత్తది..నీకు ముందే చెప్తన్న ..
చమురయ్య: హా రావాలె బిడ్డ రావాలె ..మన ఆతుగంటోళ్లకి అది బాగా అవసరం కానీ ఒక్కటి బిడ్డ తాగిన తర్వాత మాత్రం మీ బావ అంతే చూడాలే...
పుట్టని కొడుకు: ముందు బావను చూస్తా .....ఆ తర్వాత అంతే ఏంది ....ఎంతైనా చూస్తా .... నువ్వేం ఫికర్ చేయకు..
(క్వార్టర్ కంప్లీట్ ఐన తర్వాత ) ....
గమనిక : ఇక్కడ నుంచి స్టోరీ ని తాగుబోతు స్లాంగ్ లో చదవండి....అంటే బాగా తాగి మాట్లాడుకున్నట్టు గా ...మీరు తాగి చదివినా కూడా నాకేం అభ్యంతరం లేదు...(డబ్బులున్నోళ్లు కిక్కు కోసం నల్ల కుక్క (బ్లాక్ డాగ్ )ను తాగండి ....డబ్బులు తక్కువున్నోళ్లు రాజఠీవి జింక (రాయల్ స్టాగ్ ) ను తాగండి....ఏమి లేనోళ్లు మాత్రం ఇంట్లో ఉంది కదా అని శానిటైజర్ మాత్రం తాగకండి.... ఎందుకంటే ....పోతారు....అన్నట్టు మర్చి పోయాను ముందు మనం కథ లోకి పోదాం ... )
పుట్టని కొడుకు: హా...పా ..నానా గిప్పుడు గా బావ గూబె పలగాలే ....పోదాం పా వాని దగ్గరికి ....
చమురయ్య: మనం పోవుడేంది బిడ్డ... వాడే ఇక్కడికి రావాలె ..వాడే దెబ్బలు తిని పోవాలే.
పుట్టని కొడుకు:అది కాదు నాన్న వాడి మీద మనకు కోపం ఉన్నది ..కాబట్టి మనం పోవాలే ..మనం కొట్టాలె ..
చమురయ్య: మనం పోవుడే లేదు ...వాడే వాళ్ళ అన్నను వదినను తీసుకొని ఇక్కడకు రావాలే ..మనం కొట్టాలే....
పుట్టని కొడుకు:నాకు ఇప్పుడు అర్థమయితంది నానా ...అక్కలెందుకు ఇక్కడ నెలల తరబడి ఉంటాండ్రో ...గింత కోపమున్న నువ్ కొట్టడానికె పోతలేవ్... ఇక కాపురానికెందుకు అడుగుతావ్ అక్కడకు పోయి ....నాన్న నువ్ ఎం అనుకోవద్దు నానా
చమురయ్య: హే నేనేం అనుకుంట బిడ్డ ....
వెంటనే "ఫాట్"మనే శబ్దం ....చమురయ్య చంపను పట్టుకుని నిల్చున్నాడు.
పుట్టని కొడుకు: చెప్పిన కదా నానా తాగుతే జ్ఞానోదయం ఐతదని..ఇప్పుడు నీకు జ్ఞానోదయం చేస్తా ..ను ఇగ ..వాళ్ళఛ్చి చెప్తే పంపుతా ...వీళ్ళచ్చి చెప్పుతే పంపుతా అని గిట్లనే పెద్ద అక్కను ఇంట్ల ఉంచి పాడు చేసినవ్. ఇప్పుడు రెండో అక్కను పాడు చేసినవ్... నీది దొంగరేణి జాబ్ కాబట్టి అన్ని తెచ్చి పెడ్తన్నవ్. ఇక్కడ సుఖానికి అలవాటు పడుతండ్రు. అక్కడికి పోతే వాళ్లది దొంగరెణి జాబ్ కాదు కాబట్టి ఉన్నంతలా సర్దుకుందాం అంటే తేరగా నువ్ ఒకనివి దొరికినవ్ కదా ...మల్ల మొగునితోని గొడవ పెట్టుకొని ఇక్కడికచ్చి ఉంటండ్రు.
చమురయ్య:అవును బిడ్డ నువ్ పుట్టనే లేదు కదా ...ఇవన్నీ నీకెట్లా తెలుసు ...
పుట్టని కొడుకు: నేను పుట్టకున్నా ఇక్కన్నే తిరుగుతన్నా ...పెద్దక్క గొడవపుడే అద్దామనుకున్న కానీ నేనింకా చిన్న పిలగాన్నే అందుకనే రాలేదు . అవును నానా నేను ఇంకొకటి అడుగుతా ఎం అనుకోవ్ గా ..
చమురయ్య ; (చెంపకు చేతులు అడ్డం పెట్టుకుని )మల్లనా ...
పుట్టని కొడుకు:ఈ సారి కొట్టను గాని... ఏ తండ్రి అయినా కూతురు అల్లుడుతోటి గొడవ పెట్టుకొని వస్తే వారం రోజులు లేదంటే మాక్జిమం పది రోజుల్లో సెటిల్ చేసి పంపుతడు. మరి నువ్వెందే నెలల కమానంగా ఉంచుకుంటవ్...కొంచంకూడా సిగ్గు లేదా నానా నీకు..
చమురయ్య : నాకెందుకు సిగ్గు బిడ్డా .... చెట్టుకు కొమ్మ బరువా ...కొమ్మకు పండు బరువా...పండుకు తొక్క బరువా...నా బిడ్డను నేను సాదుకుంటా ...నా బిడ్డ బిడ్డ ...
వాక్యం కంప్లీట్ చేయకముందే ఈ సారి ఇంకొంచం గట్టిగా సౌండ్ వచ్చింది... రెండో చంప పట్టుకుని కూర్చున్నాడు చమురయ్య ..
పుట్టని కొడుకు: నువ్ ఇంకోసారి ఆ డైలాగ్ చెబితే పప్పుతో కొడతా..గీ మాటే అని అని ఇద్దరు కూతుర్లని చెడగొట్టినవ్ ..ఇప్పడు మూడో అక్కను చెడగొడదామని చూస్తన్నావా ....అక్కలు వచ్చినప్పుడల్లా ఆరు నెలలు ఆరు నెలలు ఉంచుకొని... మన వంశాన్ని ఆతుగంటి వంశం అని పిలవకుండా అచ్చినప్పుడల్లా ఆరు నెల్ల వంశం అని పిలుస్తున్నరు జనాలంతా .... ఇజ్జత్ పోతంది బయట ..
చమురయ్య :పోరా నువ్వు కూడా మొగోని లెక్క మాట్లాడుతన్నవ్..
పుట్టని కొడుకు: ఆ ...మొగుణ్ణి కాబట్టే మొగోని లెక్క మాట్లాడుతన్న ...పెళ్లయిన ఆడపిల్లకు మొగుడొక్కడే ఉంటడు...కానీ పెళ్లయిన మొగోనికి అమ్మ నాన్న, ఆఫీసు, అప్పులు , ఆవకాయ బద్ద అన్నీ ఉంటాయి.వాటన్నిటిని హ్యాండిల్ చేసి పెళ్ళాం దగ్గరికచ్చే సరికి నువ్వేం చేస్తన్నావ్ ...అక్కల్ని నీ దగ్గరికి తెచ్చుకుంటన్నవ్ ...ఇగ బొంగా....కుక్కను పెంచుకున్నోడన్న ప్రశాంతంగా ఉంటాడు గని నీ కూతుర్లను పెళ్లి చేసుకున్నోళ్లు మాత్రం సంక నాకి పోతండ్రు ....
పెద్దోడు అమ్మ నాన్నలతోని ఉంటుండని పెద్దక్కను తీసుకచ్చి ఇంట్ల పెట్టుకున్నవ్..రెండో వానికి అప్పులున్నాయ్ అని రెండో అక్కను ఇంట్ల పెట్టుకున్నవ్..ఇగ మూడో అక్కను ఎం చేత్తవో ...చూడాలే ...ఆ.. గుర్తుకచ్చింది ..అదేదో రజనీకాంత్ సినిమాల పెళ్ళికొడుకు వీడే కానీ ఆ షర్ట్ నాది అన్నట్టు.... పని చేసేది అల్లుడే గని ఆ పని నేను పెట్టించిందే....జీతం తెచ్చేది అయిన్నే ....కానీ జీవితం ఇప్పించింది నేను ...కారు కొన్నది అయిన్నే గని కష్టమంతా నాదే ... అంటావ్.... అయినా నువ్ పెద్ద బావ పని గురించి ఐదు వేలు నువ్ పెట్టావో లేదో కూడా తెలియదు ...దానికే నగర్ మొత్తం చెప్పినవ్...రెండో బావయే నగలు తాకట్టు పెట్టి ఆ డబ్బులే ఇచ్చి ....నేను పెట్టిన అని ఊర్లో సగం మందికి చెప్పినోనివి ....ఇగ దొంగరేణి జాబ్ గురించి అయితే ఊరు మొత్తం టామ్ టామ్ చేస్తవ్..
చమురయ్య : నన్ను కనని తండ్రి అని కూడా చూడకుండా తిడుతున్నావ్ ....రా నువ్వు
పుట్టని కొడుకు: హా ....తిట్టక ....స్ట్రెయిట్ గా ఒక క్వశ్చన్ అడుగుతా చెప్పు ....నువ్ ఏరి కోరి ముగ్గురు అల్లుళ్ళని బీదావరిఖని నుంచే ఎందుకు తెచుకున్నావ్ చెప్పు ....
చమురయ్య సైలెంట్ గా ఉంటాడు...
పుట్టని కొడుకు: నేను చెప్తా విను ......నీకు.. అమ్మకు నేను లేను కాబట్టి ...ఓన్లీ కూతుర్లే కాబట్టి ....రామ్ గోపాల్ వర్మ వోడ్క తాగేటపుడు అదేదో చెప్తాడు ...ఆయన్ ర్యాండ్ థియరీ నో....అనన్య పాండే థియరీ నో....దాని ప్రకారం ఫ్యూచర్ లో మీ సేఫ్టీ కోసం ...ముసలి వాళ్ళయ్యాక మిమ్మల్ని చూసుకోవడం కోసం అవసరం ఉన్నపుడు లేనపుడు డబ్బులిచ్చి ....భార్య భర్తల మధ్య చిన్న గొడవ అయినా సరే దాన్ని పెద్దది చేసి గొడవ పెట్టిస్తున్నారు ....ఇక్కడ మీ కూతుర్లకు మనసులో ఏముంటుంది ....మా వాళ్ళు మాకు సహాయం చేశారు కదా అని ఉంటుంది....కానీ అల్లుళ్ళకి ఏముంటుంది గొడవ అయితే సర్ది చెప్పాలి కానీ నెలల తరబడి ఉంచుకోవడం ఏంటి అని మీ పైన ద్వేషం పెంచుకుంటారు. ...కానీ పాపం వాళ్లకు తెలియంది ఏంటంటే మీక్కూడా కావాల్సింది అదే ....మీ అల్లుళ్ళు ఎంత ద్వేషిస్తే ...మీ కూతుర్లు అంత ప్రేమిస్తారని మీకు తెలుసు ...
చమురయ్య: అరేయ్ నువ్ అట్ల తిట్టకు రా....తాగిందంతా దిగిపోయింది....రా మళ్లి ఓ పెగ్గేద్దాం ...
పుట్టని కొడుకు: నాన్న నేను నీకు ఎందుకు పుట్టలేదో తెలుసా ...నిన్ను చూసి చూసి నేను కూడా ఎక్కడ తాగుబోతు గా తయారవుతానని పుట్టలేదు నాన్న ...బాయ్ నాన్న ...అమ్మను అడిగినట్టు చెప్పు.....నిన్ను మాటలతోని కడిగిన అని చెప్పు ...
చమురయ్య:రేయ్ నువ్ ఇప్పుడు పోకు రా...మనం బావను కొట్టాలి రా..రా..వుండు రా ...వుండు రా (అంటుంటే బిందెడు నీళ్లు చమురయ్య మొహం మీద పడతాయి)
చమురయ్య దెబ్బకు నిద్రలోంచి లేచి కూర్చుంటాడు ........
దుర్వార్త : ఏందయ్యా ఏందీ ...ఆ కలవరింతలు ...కొడుకేంది ....పోవుడేంది ....ఎదో మధ్య మధ్య ల అల్లుణ్ణి కొట్టాలి అంటన్నవ్ ..... ఇంకా మన పెద్దదాని వయసే 14....పెళ్లే ఇంకా కాలేదు ....అప్పుడే అల్లున్నీ కొట్టుడు గురించి ఆలోచిస్తున్నవా .....
చమురయ్య : అది కాదె దుర్వార్త ....పొద్దున్నే లేచి నీ మొహమే చూసినట్టున్న...అందుకే పీడ కలలొచ్చినయ్ ......
ఈ సారి బిందె టంగ్ .....మన్న శబ్దం వినబడింది. దుర్వార్త చేతిలో ఉన్న బిందె సొట్ట పడింది ...దూరం నుంచి భవిత భలే ..భలే ...అంటూ నవ్వింది ....కానీ చతికిల పడ్డ చమురయ్య కోలుకోవడానికి రెండు రోజులు పట్టింది.
